NEWTIMES

Bakı, 16 noyabr 2020 – Newtimes.az

Ermənistanın Baş naziri Nikol Paşinyan bir sıra yerli KİV-lərə verdiyi müsahibədə Rusiya və Azərbaycan prezidentləri ilə Qarabağla bağlı üçtərəfli razılaşmanın bəndlərini dəyişdirməyin mümkün olmadığını bildirib.

"Bəndlərin dəyişdirilməsi hərbi vəziyyətin dəyişdirilməsinə səbəb olacaq. Bu gün üçün bu qeyri-realdır", – o deyib.

Paşinyan danışıqların aparılmasının zəruriliyini və sənəddə şərh tələb edən müddəaların olduğunu qeyd edib.

Ermənistan Baş naziri müharibədən qaçmaq mümkün olduğunu, ancaq bunun üçün Ermənistanın 7 bölgəni və Şuşa şəhərini Azərbaycana təhvil verməli olduğunu əlavə edib.

Paşinyan Marqarita Simonyanın hərbi əməliyyatların dayandırılması barədə qərar vermədən əvvəl amerikalılarla məsləhətləşdiyinə dair açıqlamalarını da təkzib edib.

"Bu cəfəngiyatdır. Bu müddət ərzində Amerika tərəfi ilə 5 dəfə danışdım və barışıq səylərini müzakirə etdim. Rusiyanın səyləri ilə sülh prosesinin müddətini onlarla müzakirə etmədim", – Paşinyan bildirib.

Baş nazir eyni zamanda yüzlərlə erməni hərbçisinin itkin düşdüyünü bəyan edib.

"Dəqiq rəqəm açıqlamayacağam, ancaq yüzlərlə itkin düşən var. Ümid edirik ki, bəzilərini sağ taparıq. Ermənistan tərəfinin Dağlıq Qarabağda ölən hərbçilərinin sayı təxminən 2 400 nəfərdir", – Paşinyan yekunlaşdırıb. / Virtualaz.org